تامر حسنى ردا على منتقدى صورته: كنت بحاول أقلد المشاهير

تامر حسنى ردا على منتقدى صورته: كنت بحاول أقلد المشاهير تامر حسنى

كتب محمد تهامى زكى

رد المطرب تامر حسنى، على منتقدى صورته فى فترة المراهقة، مؤكدًا أنه كان يقلد المشاهير فى أفلامهم وكانت هذه الموضة المنتشرة فى تلك الأيام، مشددًا على أنه لم يملك المال لشراء الملابس ولا أب يصرف عليه، لكن إصراره صنع منه راجل وفنان.

وكتب تامر عبر صفحته الرسمية: "لمن يهمه الأمر، من يومين نزلت صوره ليا وأنا صغير وشغلت ناس كتير وفضلوا يتريقوا على الصورة، فى الحقيقة إنى فى الوقت ده فعلاً كنت بحاول أقلد المشاهير فى صورهم وأفلامهم وحركاتهم، وبغض النظر عن أنه فى الوقت ده كانت الموضات شبه كده، أنا بقول شبه كده لأنى كنت ولد صغير معندوش فلوس نهائى يشترى لنفسه حاجة غالية ولا عنده أب يشتريله حاجه أصلاً".

وأوضح تامر: "اللى عايز أقوله إنى من يوم الصورة دى وأنا حالف إنى أتصورها بجد وأنا مشهور، الصورة دى بتثبت لأى شاب إيجابى إن مفيش مستحيل، اللى عايز يتريق على الولد اللى فى الصورة هقوله يارب تنجح زيه، أنا فخور بالصورة دى".

وتابع تامر: "النهاردة بقول للولد الصغير ده أنت راجل عشان حلمت بحلم وحققته وبدأت من تحت الصفر ووصلت لحلمك، بمجهودك وعرقك، كمان اشتغلت شغلانات كتير فيها شقى وتعب عشان تصرف على أهلك من وأنت فى السن ده، شكرًا يا ولد يا صغير، إصرارك عمل منى راجل إنسان فنان اسمه تامر حسنى".