«الوطن» تنفرد بنص اعترافات الطبيب قاتل أسرته: «واتساب» كلمة السر

«الوطن» تنفرد بنص اعترافات الطبيب قاتل أسرته: «واتساب» كلمة السر الطبيب القاتل وزوجته المجنى عليها

الأخبار المتعلقة

تعرف على خطة طبيب كفر الشيخ للهرب من جريمته.. استخدم قفازا ولاصقا شفافا وسكينا

النائب العام: طبيب كفر الشيخ قيّد زوجته قبل ذبحها وأطفاله

طبيب كفر الشيخ وراء ذبح زوجته وأطفاله.. الجيران: "كانوا محترمين"

غدا.. أولى جلسات محاكمة المتهم بذبح زوجته وأطفاله الـ3 في كفر الشيخ

تنفرد «الوطن»، بنشر نص تحقيقات النيابة العامة الكاملة في واقعة «سفاح كفرالشيخ»، الطبيب الذي قتل زوجته وأولاده الثلاث، شنقا ثم ذبحا في آخر يوم في العام المنقضي.

أحمد عبدالله زكي، طبيب الوحدة الصحية بحي سخا، شنقهم وعندما فقدوا الوعي ذبحهم جميعا بسكين واحد وبدم بارد، لم تشفع له استغاثات زوجته، ولم يستجب لمقاومة أحد أطفاله له، الطفلة شنقها وعندما شعر بتنفسها جرها إلى جوار والدتها وذبحها.

وسردت أوراق التحقيقات تفاصيل الواقعة، وكيف بدأت علاقته بزوجته؟، كيف تزوجها دون أن تجمعهما قصة حب؟، كيف خطط لارتكاب الجريمة قبل 5 أشهر من واقعة القتل، يسرد تفصيلا لماذا خطط لقتل أولاده بعد زوجته، وما دافعه للقتل، ولماذا أخفى مشغولات المجني عليها الذهبية، وأخفاها مع «الجاكت»الخاص بطفلته.

«حاولت قتلهم أكثر من مرة والظروف منعتني وقلبي مطاوعنيش»

يكشف «السفاح»، في تحقيقات النيابة، عن محاولاته المتكررة لقتل زوجته وأطفاله الثلاثة، فخطط لقتلهم في شهر يوليو.

وقال المتهم بذبح زوجته وأولاده، في تحقيقات النيابة، إنه تزوجها في بداية عام 2009 زواجا تقليديا، كان حينها يعمل في السعودية، وخطبتها له والدته، ثم كتب كتابه عليها بموجب توكيل رسمي وكله لوالده، لتسافر له وهي عروس، لم يكن يحبا بعضهما البعض، فزواجها كان روتينيا، لكنه كان خاليا من المشاكل الكبيرة، حتى جاء شهر يوليو عام 2018، بدأ يخطط لقتلهم جميعا.

واعترف المتهم في أوراق القضية تفصيليا أمام المستشار أحمد شفيق رئيس نيابة كفر الشيخ، وتحت إشراف المستشار ياسر الرفاعي المحامي العام لنيابات كفر الشيخ، لتنتهي التحقيقات ويُحال إلى محاكمة عاجلة أمام محكمة الجنايات.

وفيما يلي نص التحقيقات:

اسمى أحمد أحمد عبدالله زكي السيد، 41 سنة، طبيب بشري بمديرية الصحة في كفر الشيخ، الوحدة الصحية بسخا، ومقيم ببرج عمر ابن الخطاب رقم 4 بمساكن تجمع مبارك السكني، شقة رقم 19 دائرة قسم كفر الشيخ.

المحقق: ما تفصيلات اعترافك؟

المتهم: "هو اللي حصل إني كنت شغال في السعودية منذ عام 2008 وأهلي خطبولي زوجتي منى محمد فتحي السجيني، وأنا في السعودية، وكتبوا كتابي بتوكيل كنت عامله لوالدي، وبعدين منى جاتلى وأنا في السعودية، وكنا عايشين حياة طبيعية، لحد شهر يوليو 2018، كنت ماسك موبايل زوجتي منى بالصدفة، واكتشفت وجود أربعة صور"اسكريت شوت"، لمحادثة بينها وبين شخص مجهول، على برنامج "الواتس آب"، ولما واجهتها بالمحادثات دي لأنها كانت بتدل على علاقة بينها وبين الشخص ده، اعترفت بالعلاقة وقالت لي إنها علاقة قديمة، وأنها بتعمل كدة علشان تخلص معاه مصلحة، ومعرفش هي إيه، فأنا اتخانقت معاها وسيبت البيت ومشيت".

وقبل ما أمشي، كانت بتحاول تمنعني علشان أفضل، بس أنا كنت بزقها وأضربها في إيديها ومشيت روحت شقة مملوكة لي في مدينة نصر، وقعدت حوالي أربعة أيام، وابني عبدالله كان شاف الخناقة دى فقال لحماتى، وحماتى كلمتنى وقالتلى معلش استحملها فأنا رجعت البيت، وعشت مع مراتى حياة طبيعية، بس موضوع الرسائل اللى أنا شوفتها فضل شاغلنى طول المدة دى، وفكرت أقتلها أو أطلقها أو أسيبها وأسافر، ولقيت ان الحل الأسلم أنى أقتلها وأتخلص منها، وفكرت كذا مرة أقتلها وحاولت أكتر من مرة، طول الفترة دى، لكن مكنش بيجيلى الجرأة أنى اقتلها، وساعات تانية الظروف مكنتش سامحة إنى أقتله؟

الطبيب: «اكتشفت وجود إسكرين شوت من محادثة عاطفية بينها وبين رجل مجهول على الواتس آب قبل الحادث بـ5 أشهر.. فواجهتها فقالت علاقة قديمة وبكلمه علشان أخلص مصلحة»

أضاف: "وفي يوم 31/12/2018 لما صحيت الصبح قررت أنى أنفذ وأقتلها ولما صحيت من النوم كانت هى نايمة، ولما صحيت جاءت قعدت معايا في غرفة المعيشة وفطرت وهى قاعدة معايا وبعدين شربنا شيشة إحنا الإثنين، وبعدين قولتلها تعالى نمارس الجنس بطريقة جديدة ورحت قتلتها".

وتابع: "شديت حبل الستارة الموجودة على البلكونة، في أوضة النوم وقعدت فوق مراتى ورفعت دماغها، وبعدين عديت الحبل وخنقتها بيه وهى كانت بتصرخ، وانا كنت ماسك الحبل بايدى الأثنين، فكنت بنزل بصدرى على دماغها واضغط عليها علشان أكتم صوتها في البطانية، لحد ما فقدت الوعى، لكن جاى أبص عليها، لقيتها فاقدة الوعى لكن لسة بتتنفس، وصدرها بيتحرك، فأنا فكيت السلوتيب، عن ايديها ورجليها وشديتها من رجليها وطلعتها برة في الصالة، أمام البوفيه المواجه للطرقة ونيمتها على ظهرها وبعدين رحت جبت "السكينة"، من المطبخ ودبحت منى مراتى فى الصالة".

أحمد: «غسلت يدي ووشي من الدماء ورميت السلوتيب في المطبخ وارتديت ترننج فوق البيجامة»

واستكمل: "وبعدين انا كنت لبست جوانتى وانا بدبحها بالسكينة، كنت شاريه من أربع أيام علشان لما تيجى الفرصة أنفذ وبعدين أخدت الحبل اللى خنقت بيه منى، ودخلت بيه أوضة الأطفال اللى كان فيها أولادى الثلاثة، ابنى عبدالله كان نايم على السرير اللى على الشمال، وعمر ابنى كان نايم هو وبنتى ليلى على نفس السرير اللى جانبه الموجود تحت الشباك اللى في الأوضة، والثلاثة كانوا نايمين".

واصل: "بعدين خنقت "ليلى" بالحبل بس ممتتش وكان لسة فيها النفس، فأنا شيلتها وحطيتها جنب أمها في الصالة ودبحتها بنفس السكينة، وبعدين دخلت أوضة الأطفال تانى بالسكينة، ودخلت على عمر وكان لسة نايم هو وعبدالله، وبعدين دبحت عمر بنفس السكينة، وكان بيتحرك وأنا بدبحه، بس مقاومنيش، وبعد ما ذبحته ذبحت عبدالله، وكان لسة نايم برضه، بس صحى وانا بدبحه وقاومنى، وكان بيحاول يبعد السكينة بايده، بس انا أتملكت منه وذبحته بنفس السكينة برضه، وبعدين دخلت أوضة النوم بتاعتى أنا ومراتى، وأخدت علبة الذهب من الدولاب بتاعها وبعدين فتحت كل الدلف ونكشت الهدوم ووقعتها على الأرض علشان الموضوع يبان كأنه سرقة".

القاتل: «كتفت زوجتي بحبل ولاصق وشنقتها ثم شديتها من رجليها وأخرجتها للصالة وذبحتها بسكين المطبخ».

وبعدين جبت كيس وحطيت فيه علبة الدهب والسكينة والحبل والجوانتى ودخلت غسلت ايدى ووشى في الحمام وانا كنت رميت اللازق اللى كنت رابط بيه مراتى في المطبخ، وانا بجيب السكينة، ولبست الترننج فوق البيجامة واخدت الحاجة ونزلت واخدت عربيتى ورحت للنجار واسمه"عبدالله"، علشان كنت هخده معايا، علشان يشتغل في الشقة بتاعة عمر أخو مراتى، بس هو قالى انه مش فاضى، فطلعت على البنك الأهلى ، علشان اعمل خدمة فون كاش بس لقيت البنك زحمة، فمشيت.

وذكر: "اخدت العربية وطلعت على طريق المحلة بعد كوبرى متبول بحوالى 2كيلو متر وقفت العربية ونزلت أخدت الكيس اللى فيه الحاجة ورميته تحت"هيش"، كان موجود على جانب الطريق وبعدين أخدت بعضى ورجعت على البيت، وكان البواب موجود تحت سلمت عليه وطلعت على الشقة وفتحت ودخلت، ونزلت تانى للبواب وقلت له ألحقنى مراتى وأولادى مقتولين، في الشقة فطلع معايا وفتحت باب الشقة، وهو لما شاف مراتى وبنتى ليلى مرمين في الصالة مرضيش يدخل، ونزل وانا فضلت في الشقة، وكلمت حماتى وأمى وخالى وأخويا، وقولتلهم ألحقونى لقيت مراتى وعيالى مقتولين في الشقة".

وأردف: "وبعدين أخدت بعضى ونزلت، وانا راكب الاسانسير قابلت جارى، اسمه "عطية حسن عطية خميس" وقلت له أنا لقيت مراتى وعيالى مقتولين في الشقة، ولما نزلت تحت لقيت حماتى وصلت والناس بدأت تتلم، فطلعت لوحدى تانى، علشان اودعهم وفضلت قاعد شوية لحد ما الشرطة وصلت، وقلت لهم انا رجعت من برة لقيت مراتى وعيالى مقتولين وده كل اللى حصل".

س: متى وأين حدث ذلك؟

"الكلام ده كان بتاريخ 31/12/2018، حوالى الساعة  12 ونص ظهراً فى الشقة بتاعتى في الدور الخامس برج عمر 4 عمر بن الخطاب بمجمع ابراج مبارك بسخا دائرة أول كفر الشيخ. ِ

الطبيب القاتل: «اشتريت جوانتي من صيدلية بالقاهرة قبل الواقعة بـ4 أيام ويومها فطرنا وتناولنا الشيشية سويا وقولت لها تعالى نمارس الجنس وقعدت فوقها وحطيت صدرى على دماغها علشان أكتم صوتها بعد صراخها وشنقتها».

من كان يرافقك انذاك؟

"أنا كان معايا مراتى منى وأولادى ليلى وعمر وعبدالله".

من هو الشخص القائم بقتل المجنى عليهم منى محمد فتحى السجينى، ليلى احمد عبدالله ذكى، عبدالله احمد عبدالله ذكى، عمر احمد عبدالله ذكى؟

"أنا اللى قتلتهم الأربعة".

وهل شارك أحد في إرتكاب الواقعة؟

"انا محدش اشترك معايا انا عملت كدة لوحدى ومحدش كان يعرف".

وما هى علاقتك بالمجنى عليهم؟

"منى مراتى والباقين أولادى".

وهل كانت العلاقة الزوجية ما زالت مستمرة بينك وبين المتوفاة إلى رحمة مولاها منى محمد السجينى؟

المتهم: "أيوه".

هل سبق لك قيامك بتطليق المتوفاة الى رحمة مولاها منى محمد السجينى؟

"مطلقتهاش ولا مرة".

متى بدأت العلاقة الزوجية بينكما؟

اتجوزتها في بداية عام 2009.

وما كيفية إتمام زواجك من سالفة الذكر؟

أنا كنت شغال في السعودية منذ عام 2008 وبعدين أبويا وأمى خطبولى مراتى منى في آخر عام 2008 وبعدين عملت لوالدى توكيل وكتب كتابى على منى وهى جاءت لى السعودية، وفضلنا مع بعض في السعودية، وكنا بنتردد على مصر في الأجازات وكنا بنرجع مع بعض على السعودية، لحد شهر فبراير عام2017، كنا قررنا إننا نستقر في مصر فهى نزلت بالولاد وقعدت بيهم في مصر في شقتنا اللى في سخا محل الواقعة، وأنا كنت باجى في الإجازة وبعدين رجعت تانى السعودية لوحدى، وبعدين رجعت مصر إستقريت في فبراير 2018"

س: ما هى طبيعة العلاقة الزوجية بينك والمتوفاة إلى رحمة مولاها منى محمد فتحى السجينى؟

ج: "إحنا مكناش بنحب بعض، إحنا كنا متزوجين زواج روتينى، لكن كانت حياتنا طبيعية ومستقرة لحد شهر يوليو عام 2018".

س: وهل من ثمة خلافات نشبت بينك وبين المتوفاة طيلة تلك الفترة؟

"أيوة هى كانت خلافات زوجية عادية بتحصل بين أى زوجين ومكانش فيه أى خلافات قوية لحد ما اكتشفت 4 رسائل اسكرين شوت على موبايلها".

وما طبيعة ما قمت باكتشافه تحديداً على الهاتف النقال الخاص بزوجتك المتوفاة؟

أنا لقيت أربع صور "اسكرين شوت"، لمحادثة بينها وبين شخص آخر.

وما هى كيفية اكتشافك لذلك؟

أنا اكتشفت الواقعة دى بالصدفة علشان أنا أخدت تليفون مراتى علشان أدور على نمرة وفضولى دخلنى على الصور فلقيت الكلام ده".

وما الذى كانت تحويه تلك الصور تحديداً؟

كانت عبارة عن اسكرين شوت، هى كانت واخداها من تطبيق الواتس آب الخاص بيها، لمحادثة كانت بينها وبين شخص آخر.

وما مضمون تلك الرسائل تحديداً؟

الرسائل كانت تدل على وجود علاقة عاطفية بينها وبين الشخص ده، علشان كانت بتقوله فيها وحشتنى وما أقدرش اعيش من غيرك، والشخص كان بيبادلها نفس الكلامِِ، بس مش فاكر الكلام بالتفصيل.

ومن هو الشخص الذى هو الطرف الثانى بالمحادثة التى قمت بالعثور على صورة منها؟

هو شخص أنا معرفوش.

هل قمت بمواجهة زوجتك المتوفاة بما عثرت عليه بهاتفها النقال؟

هى أقرت لى لما واجهتها بأنها على علاقة بذلك الشخص وأقرت لى أنها علاقة قديمة وانها كانت بتكلمه علشان تخلص منه مصلحة، بس مرضيتش تقولى هيا كانت بتكلمه ليه.

وهل قمت بسؤالها عن هوية ذلك الشخص؟

"سأتلها بس هى رفضت تقولى هو مين".

وما هو الرقم الموجود بتلك المحادثة كطرف ثانى؟

أنا مش فاكر الرقم ومكنش مسجل باسم.

وكيف توقفت على أن زوجتك المتوفاة طرف بتلك المحادثة التى قمت باكتشاف صورها على الهاتف النقال الخاص بزوجتك؟

"علشان هو في المحادثة كان بيناديها باسمها وأنا لما واجهتها اعترفت بها ولم تنكر".

وما وصف الهاتف النقال الخاص بزوجتك ورقم الشريحة الخاص به؟

"هو هاتف محمول ماركة سامسونج نوت ايدج لونه ذهبى وخلفيته سوداء وبه شريحة فودافون بس أنا مش فاكر الرقم".

وما التصرف الذى بدر منك حيال اكتشافك لصور تلك المحادثة؟

"أنا واجهتها بها وحدث ما بينا مشادة كلامية".

وماهى تفصيلات تلك المشادة الكلامية؟

هو أنا بعد ما واجهتها كلمت الشخص في التليفون وقالت له، أنا ست متزوجة ومش عاوزة مشاكل وابعد عنى وقفلت وأنا لميت هدومى وقبل ما أمشى وقفت لى على باب الشقة علشان مكانتش عوزانى أمشى بس أنا ضربتها في إيديها وزقيتها.

وهل ترتب على ذلك ثمة إصابات بالمجنى عليها زوجتك.

لا.

ومن كان على علم بتلك الخلافات؟

هى حماتى عرفت إن إحنا إتخانقنا بس معرفتش سبب الخناقة.

وهل انتهى ذلك الخلاف المثار بشأن عثورك على صور لمحادثة بين زوجتك المجنى عليها وشخص مجهول؟

هى حماتى كانت كلمتنى وقالتلى متزعلش لكن حماتى متعرفش حاجة عن الخلاف ومراتى كانت جاءت لى شقتى الموجودة في مدينة نصر علشان تصالحنى، واعتذرت لى ورجعت معاها بعد ما قعدت اربعة أيام.

ومتى بدر إلى ذهنك ارتكابك للواقعة قبل التحقيق؟

عقب اكتشافى للرسائل التى قمت بالعثور عليها فكرت أنى أطلق مراتى أو أسافر وأسيبها، أو أقتلها وبعدين لقيت أن الحل الأسلم إنى أقتلها وبعدين فكرت إنى اقتلها أزاى والكلام كان في شهر يوليو عام 2018.

وما طبيعة العلاقة التى كانت بين الشخص المجهول وبين زوجتك المتوفاة؟

الواضح من الرسائل اللى أنا شفتها إنها علاقة عاطفية.

وهل امتدت تلك العلاقة العاطفية بين سالفى الذكر في وجود علاقة جنسية فيما بينهما؟

لا لأن أنا لما واجهتها قالت لى مفيش علاقة جنسية وأنا شكيت إن فيه علاقة جنسية ما بينهم.

ما سبب تساور الشك لديك بوجود علاقة جنسية بينهما؟

بسبب المحادثة اللى أنا عثرت على صورها.

وهل تأكدت من وجود علاقة جنسية بين زوجتك المتوفاة وبين ذلك الشخص المجهول؟

أنا اتأكدت إن كان في علاقة جنسية بينهم علشان كان في كلام في الرسائل يدل على كدة انا مش فاكره.

وما هى المدة التى قمت باستغراقها في التفكير بإيقان لفعلتك الإجرامية؟

أنا بفكر أنى اقتل مراتى من يوم ما اكتشفت الرسائل في غضون شهر يوليو عام 2018، إلى أن قمت بالتنفيذ أمس في 31/12/2018.

وما هى الأفعال المادية التى قمت بها من أجل التجهيز لارتكاب تلك الواقعة؟

كان لسة مجرد تفكير وأول فعل أقوم به كان منذ 4 أيام سابقة للواقعة.

وما هو ذلك الفعل؟

أنا اشتريت جوانتيات علشان أنفذ بيها.

وهل سبق ذلك طيلة تلك الفترة محاولة قتل أي من المجنى عليهم؟

أنا حاولت فعلا أنى أقتل مراتى منى كذا مرة، خلال تلك الفترة هى وأولادى، الثلاثة، بس أوقات الظروف مكانتش بتسمح وكان أمرى هينكشف بسهولة لو كنت قتلتهم في أوقات تانية، ولما كانت الأمور بتسمح مكانش بيجيلى الجرأة أنى اقتلهم وبأرجع في كلامى.

وما هو سبب عدم قيامك بتنفيذ فعلتك الإجرامية التى انتويت ارتكابهاِِ طيلة تلك الفترة؟

علشان ساعات الظروف مكانتش بتسمح، وساعات تانية كنت بأبقى متردد علشان دول مراتى وأولادى، وقلبى مكانش بيطاوعنى.

وما هو سبب تحديدك أمس لارتكاب تلك الواقعة؟

علشان ده كان أكتر يوم الظروف كانت تسمح فيه خلال تلك الفترة علشان كان عندى مشوار مهم وكان لازم أعمله وهم كانوا على علم به، مراتى وأهلها وبالتالى هأقدر أنزل ويبقى فيه شهود أنى مكنتش موجود في البيت، والمشوار كان أنى هروج أجيب نجار علشان يشتغل في شقة اخو مراتى إسمه عمرعلشان فرحه يوم 11/1/2019.

وما هو تاريخ وساعة إرتكابك لتلك الواقعة تحديداً؟

أنا ارتكبتها أمس 31\12\2018 الساعة 12و30دقيقة ظهراً بمنزل الزوجية الكائن ببرج عمر بن الخطاب رقم 4 بسخا دائرة قسم أول كفر الشيخ بالطابق الخامس علوى.

ملك من تلك الشقة؟

هى بتاعة واحدة اسمها فاطمة محمد مصطفى.

وما هو سند إقامتك بتلك الشقة؟

أنا مأجرها بعقد إيجار من مالكتها بتاريخ1/7/2017 وحتى 1/7/2019 وقبلها أنا كنت قاعد مع مراتى بمنزل العائلة بالمدينة التجارية دائرة ثان كفر الشيخ، بس إحنا بعناه وأجرنا الشقة دى.

وما هى الأدوات التى قمت بتجهيزها في ارتكاب تلك الواقعة؟

أنا اشتريت جوانتى لليد قبل الواقعة بحوالى 4 أيام علشان البصمات وأنا كنت ناوى اقتل مراتى وأولادى عن طريق الشنق بالحبل بتاع الستارة وهو كدة كدة موجودِِ فى البيت، أنا كنت مخطط أن انا أكتف مراتى باللاصق الشفاف "السلوتيب"، وهو كدة كدة برضو موجود في البيت.

وما هو سبب اختيارك لقتلهم بطريقة الشنق؟

علشان كان في دماغى أنها طريقة سهلة للقتل ومن غير دم.

وما هى كيفية قيامك بقتل المجنى عليها زوجتك المتوفاة؟

أنا اشتريت جوانتى من أربعة ايام من إحدى الصيدليات الموجودة بالقاهرة وقمت بإخفائه بحقيبة خاصة بى في غرفة النوم الخاصة بى وبزوجتى وفى يوم 31/12/2018 وعقب استيقاظ زوجتى حوالى الساعة 11 و45 دقيقة صباحاً، اتفقت معاها إننا نمارس الجنس بطريقة سادية، فجبت السلوتيب من الدولاب وقيدت بيه إيديها خلف ظهرها، وقدميها وبعدين رحت جبت حبل الستارة الموجودة على البلكونة بتاعة أوضة النوم ورفعت دماغها ولفيت الحبل حوالين رقبتها، وشنقتها بيه وفقدت الوعى، بس لقيت صدرها بيتحرك ولسة بتتنفس، فشديتها من رجليها وسحبتها لحد الصالة، ونيمتها على الأرض على ظهرها أمام البوفيه، وبعدين دخلت لبست الجوانتى، ودخلت المطبخ جبت السكينة وبعدين طلعت ذبحتها من رقبتها وفكيت اللاصق بعد كدة وبعدين دخلت رميت اللاصق اللى أنا كنت رابطها بيه في المطبخ.

وماهى كيفية قيامك بقتل المجنى عليها كريمتك الطفلة ليلى احمد عبدالله ذكى؟

هو أنا بعد اما قتلت مراتى اخدت الحبل ودخلت علشان أشنق بنتى ليلى في الأوضة بتاعة الأطفال اللى كان فيها أولادى الثلاثة، وباب الأوضة كان مقفول وانا فتحته ودخلت، والثلاثة كانوا نايمين،فلفيت الحبل حول رقبة ابنتى ليلى وخنقتها بس مماتتش لكنها فقدت الوعى، فشيلتها وطلعت بيها على الصالة، وحطيتها جنب مامتها على يمينها، وأخدت السكينة وذبحتها بيها.

وما كيفية قيامك بقتل نجليك الطفل عمر أحمد عبدالله ذكى السيد، عبدالله أحمد عبدالله ذكى السيد؟

هو أنا بعد ما قتلت مراتى وابنتى ليلى دخلت أوضة الأطفال بالسكين وذبحت ابنى عمر من رقبته وبعدين قتلت ابنى عبدالله.

حدد لنا ترتيب قتلك للمجنى عليهم تحديداً؟

أنا قتلت مراتى في الأول وبعدين قتلت ابنتى ليلى وبعدين قتلت ابنى عمر، وبعدين قتلت ابنى عبدالله.

وماهو سبب قيامك بالبدء بقتل المجنى عليها منى محمد السجينى؟

علشان هى أول واحدة صحيت فيهم.

وأين كان المجنى عليهم أولادك الثلاث حال قيامك بقتل المجنى عليها زوجتك سالفة الذكر؟

هما الثلاثة كانوا نايمين في أوضة الأطفال بتاعتهم كالمعتاد.

وهل قامت المجنى عليها منى محمد فتحى السجينى بمقاومتك واٌستغاثة حال قيامك بقتلها؟

أيوة هى كانت بتصرخ وكانت بتحاول تقاوم بس أنا كنت باضغط على رأسها بصدرى علشان أكتم وشها في البطانية، ومعرفتش تقاوم علشان كنت قاعد فوقها.

وهل استيقظ أحد من أبناءك الثلاث على صوت استغاثة المجنى عليها؟

لا

وهل قام أى من أبناءك الثلاث بمقاومتك واٌستغاثة حال قيامك بقتله؟

ليلى لم تستغث ولم تقاوم بسبب أنها كانت نايمة، وعمر كان بيحاول يقاوم بس أنا اتملكت منه وذبحته، وعبدالله هو الوحيد اللى قاومنى وكان بيحاول يزق السكينة بأيده.

ومن أين استحصلت على السكينة التى قمت بها بارتكاب الواقعة ؟

هى سكينة المطبخ اخدتها من المطبخ بتاعنا.

وكم عدد الأسلحة التى قمت باستخدامها في تلك الواقعة؟

أنا قتلتهم كلهم بنفس السكينة.

حدد لنا مكان بداية وضع السكين على رقبة المجنى عليهم الأربعة حال قيامك بقتلهم؟

أنا ابتديت بوضع السكينة على رقبتهم جميعاً من ناحية يسار رقبتهم إلى يمينهم، ما عدا عبدالله ابتديت بوضع السكين على رقبته من الجهة اليمنى له إلى الجهة اليسرى.

القاتل: «اتصلت بحماتي وأمي وخالي وأخويا وأبلغتهم والحارس هو من أبلغ الشرطة»

حدد لنا موقعك بالنسبة للمجنى عليهم جميعاً بعداً ومستوى واتجاهاً حال تنفيذك عليهم؟

هى مراتى منى لما كنت باخنقها كانت نايمة على وشها على السرير وأنا كنت قاعد فوقها على ظهرها ولما ذبحتها بالسكينة كانت نايمة على ظهرها على الأرض وكانت على يمينى، والمسافة كانت قريبة جداً وبالنسبة لعمر هو كان نايم على السرير وأنا كنت واقف أمام السرير، والمسافة كانت قريبة جدا برضه ونفس الوضع بالنسبة لعبدالله وبالنسبة لليلى وأنا بأخنقها، كانت رأسها أمامى وكانت نايمة على السرير على ظهرها، وأنا خلف رأسها، وملا كنت بذبحها كانت نايمة على الأرض والمسافة كانت قريبة جدا، وكانت على يمينى برضه.

وما هو سبب قيامك بإرتكاب تلك الواقعة وقتل زوجتك وأبناءك الثلاث؟

أنا قتلت زوجتى منى بسبب شكى في سلوكها والرسائل التى اكتشفتها على موبايلها وأولادى علشان مكانش ينفع يعيشوا بعد ما أقتل أمهم.

وما هو قصدك من ارتكاب تلك الواقعة والتعدى على المجنى عليهم؟

هو كان قصدى قتلهم والتخلص منهم.

وهل قمت بالذهاب إلى العمل بتاريخ 31/12/2018؟

لا أنا مروحتش علشان إحنا مقسمين الشغل بينى وبين زملائى واليوم اللى مش بأروح فيه أى شخص بيمضى مكانى.

ومن الذى قام بالتوقيع بدلا منك بتاريخ الواقعة؟

معرفش.

وهل أي من العاملين معك على علم بارتكابك تلك الواقعة أو من قام بالتوقيع بدلاً منك؟

لا.

وهل قام أحداً بمساعدتك بارتكاب تلك الواقعة؟

لا.

وهل قام أحدا بتحريضك على ارتكاب تلك الواقعة؟

لا.

ما هو كيفية وجود آثار دماء على ملابسك التى ترتديها الآن؟

هى البيجامة اللى أنا لابسها دلوقتى تحت الترننج هى دى اللى انا كنت لابسها ساعة الواقعة، وهى عبارة عن تى شيرت رصاصى، وكم اسود اللون وبنطلون قماش رصاصى اللون وبعد ما خلصت لبست الترننج الكحلى اللى انا لابسه دلوقتى ولما دخلت علشان اودعهم جه على الكم من جوه دم.

وهل قمت بالاستيلاء على ثمة منقولات من المسكن؟

أيوة أنا اخدت علبة الدهب بتاعة مراتى بس معرفش محتوياتها أيه بس هى فيها دهب خاص بمراتى.

وما هو سبب استيلاءك على علبة المشغولات الذهبية الخاصة بزوجتك؟

علشان أوهم الناس إنها واقعة سرقة، وأبعد الشبهة عنى.

وما تعليقك على وجود بعثرة بدولاب الملابس بغرفة النوم؟

أنا بعد ما قتلتهم الأربعة، بعثرت الملابس علشان أوهم الناس إنها سرقة.

وما التصرف الذى بدر منك عقب إتمام جريمتك وقتل زوجتك وأبناءك الثلاث؟

أنا لبست الترننج فوق البجامة وقلعت الجوانتى، وغسلت أيدى ووشى في الحمام وبعدين جبت كيس حطيت فيه السكينة، والحبل والدهب، والجوانتى وأخدتهم ونزلت علشان أخفيهم.

وما هى كيفية إخفاءك لتلك الأشياء؟

أنا أخدتهم وروحت أجيب النجار يشتغل في شقة عمر أخو مراتى، علشان أثبت انى مكنتش موجود في الشقة ساعة الواقعة بالعربية بتاعتى ولما النجار قال لى أنه مش فاضى، رحت البنك الأهلى المصرى الموجود بالأوقاف بس لقيته زحمة، فمشيت علطول ورحت على طريق المحلة وبعد كوبرى متبول بحوالى اثنين كيلو متر لقيت هيش على جانب الطريق فقمت بوضع الكيس وبداخله الاشياء السالف ذكرها تحته.

هل من ثمة حوار دار بينك وبين المجنى عليهم حال قيامك بالتعدى عليهم وقتلهم؟

لا

ما وصف السلاح الأبيض الذى قمت باستخدامه في واقعة التعدى على المجنى عليهم وقتلهم؟

سلاح أبيض سكين المطبخ، لها أيد بلاستيك أزرق في أبيض وقصل معدنى حاد.

وما علاقتك بتلك المضبوطات المعروضة عليك الآن؟

العلبة الجلدية وما بداخلها من ساعات يد ومشغولات ذهبية هى خاصة بزوجتى والتى قمت بالاستيلاء عليها من دولاب الملابس عقب ارتكابى للواقعة وبالنسبة للجوانتى والسكين فهم المستخدمان فى ارتكابى للواقعة وبالنسبة للحبل فهو ده الحبل بتاع ستارة البلكونة الموجودة في غرفة النوم اللى انا اخدته وخنقت بيه مراتى منى وابنتى ليلى، وبالنسبة للجاكت المعروض على فده بتاع ابنتى ليلى كان موجود على الأرض وأنا اخدته علشان كان عليه آثار دم بعد ماذبحتهم، وبالنسبة للمظروف الصغير وما به من مبلغ مالىفانا كنت مديه لمراتى كمعايدة منى في العيد الصغير، وبالنسبة لآثار بقع الدم الحمراء الموجودة على المضبوطات المعروضى عليا، فهى آثار دماء مراتى وابنائى بعد مادبحتهم.

وهل قمت بأخذ العلبة ومابداخلها من دولاب الملابس بغرض تملكه؟

أنا مكانش قصدى أسرقه، أنا كنت واخده أخفيه علشان أوهم الناس أنها واقعة سرقة فقط.

وماهى كيفية وظروف عرضك علينا؟

أنا كنت موجود في الشقة وفى واحد معرفش لا اسمه ولا صفته، اخدنى وركبنى بوكس وطلع بيا على القسم وفضلت قاعد في مكتب لحد ما عرضونى على النيابة النهاردة "بعد الواقعة بساعات قليلة".

ومن هو القائم على ضبطك تحديداً؟

هو واحد أنا معرفوش .

وما هو سبب قيامه بضبطك؟

هو قالى هناخد منك كلمتين في القسم.

وما الذى حدث تفصيلاً حال دخولك لديوان القسم؟

هما قعدونى في مكتب وكان فيه ناس بتناقشنى، وأنا أقريت ليهم بالواقعة زى ما حكيت هنا بالضبط.

هل من ثمة علاقة أو خلافات بينك وبين العقيد عبدالفتاح المنشاوى؟

مفيش أي علاقة ولا خلافات.

ما قولك فيما سطره سالف الذكر بمحضر التحريات المؤرخ بتاريخ31/12/2018، الساعة 11مساء "تلوناه عليه تفصيلاً"؟

أيوه فعلاً أنا اللى قتلت زوجتى واولادى.

وما قولك فيما سطره سالف الذكر بالمحضر المؤرخ 1/1/2019 الساعة1و45 دقيقة صباحاً "تلوناه عليه تفصيلاً"؟

أنا فعلا قتلت زوجتى وأولادى بعدما شكيت في سلوكها، وأنا فعلا اللى أرشدت المباحث عن المضبوطات وروحت معاهم وجيبناها.

وأين توجد صور المحادثات التى قمت باكتشافها بالهاتف النقال الخاص بزوجتك؟

هى مسحتهم من على تليفونها ومعادوش موجودين.

وهل عثرت على ثمة صور أخرى بهاتف زوجتك؟

أنا لقيتها مصورة نفسها ثلاثة صور بالملابس الداخلية بس وهى مسحتهم برضو.

وهل قامت بإرسال تلك الصور لثمة أشخاص؟

لا هى كانت موجودة على تليفونها بس.

هل من ثمة علاقة أو خلافات بينك وبين محمد أحمد محمد بسطويسى؟

هو الكاتب الخاص بتاع الوحدة الصحية التى أعمل بها ومفيش بينى وبينه أي خلافات.

وما قولك بما قرره سالف الذكر بتحقيقات النيابة العامة "تلوناه عليه تفصيلا"؟

أنا فعلاً لم أحضر للعمل بتاريخ31/12/2018، بس هم بيحضرونى في الشغل عن طريق توقيع أى حد من الزملاء بدلاً منى.

وهل أنت القائم بالتوقيع في دفتر الحضور والانصراف بتاريخ 31/12/2018؟

أنا لم أوقع بالدفتر بتاريخ 31/12/2018 وأنا آخر مرة حضرت فيها الشغل ووقعت فيها كان يوم 26/12/2018.

وهل من ثمة علاقة أو خلافات بينك وبين حسن عبد الكريم عبد المجيد زيدان؟

جده بواب العمارة اللى انا ساكن فيها، ومفيش بينى وبينه أي خلافات.

وما قولك فيما قرره سالف الذكر في تحقيقات النيابة العامة "تلوناه عليه تفصيلا"؟

أيوه هو ده اللى حصل.

وما قولك بما قرره المدعو عطية حسن عطية خميس بتحقيقات النيابة "تلوناه عليه تفصيلا"؟

أيوه هو ده اللى حصل وانا كنت بعمل كدة علشان أوهمهم بأن أنا اللى اكتشفت الموضوع وماعملتش كدة.

وما هو سبب إقرارك بارتكاب تلك الواقعة؟

علشان أنا غلطان وأستحق العقاب فقلت الحقيقة.

هل أنت مستعد للانتقال برفقتنا الآن لمسرح الجريمة لإجراء المعاينة التصويرية للواقعة وفقاً لإقرارك؟

أيوة أنا مستعد لذلك الآن.

وهل تشكك في نسب أولادك إليك؟

لا.. هم أولادى وزوجتى أنجبتهم في الفترة اللى كنت معاها دائما في السعودية.

وما سبب قيامك إذا بقتلهم؟

أنا قتلتهم علشان مينفعش يعيشوا بعد ما والدتهم اتقتلت، وانا كنت ناوى من البداية أقتلهم بعد ما أقتل والدتهم.

ما طبيعة تلك الورقة التى قمت بتقديمها إلينا الآن؟

هى دى الورقة الخاصة بالانتظار اللى أنا اخدتها من البنك الأهلى والرقم الثابت بها 565 هو ده رقم دورى في البنك.

وما طبيعة العملية التى قمت بها بالبنك الأهلى وما هو سببك توجهك إليه بذلك التاريخ؟

أنا معملتش أي عمليات في البنك، أنا كنت رايح فقط علشان أثبت وجودى، في أى مكان علشان أبعد الشبهة عنى بعد ما النجار مرضيش يجى معايا.

وما هو فرع البنك الأهلى المصرى الذى توجهت إليه بذلك التاريخ؟

هو فرع البنك الأهلى المصرى فرع الأوقاف.

مطلوب منك تقديم جاكت التريننج العلوى لإرساله لمصلحة الطب الشرعى لفحص التلوثات الحمراء الموجوده به؟

أنا مستعد لذلك الآن وأقدمه طواعية للنيابة العامة وأقدم أيضاً البيجامة التى كنت أرتديها أثناء ارتكابى للواقعة والتى أرتديها الآن.

وما تقييمك فيما ثبت للنيابة العامة حال مناظرة جثامين المتوفين إلى رحمة مولاهم ارتداء أطفالك الثلاث لملابس خروج؟

إحنا كنا خارجين قبل الواقعة بيوم بالليل أنا وأولادى وحماتى علشان كنا رايحين نحجز كوافير لعروسة أخو مراتى ولما رجعنا أولادى ناموا بلبس الخروج ومغيروش.

وما علاقتك بأطفالك الثلاثة تحديداً؟

أنا علاقتى بيهم كانت كويسة جداً وهما كانوا بيحبونى جداً، بس كان لازم أموتهم علشان أنا كنت ناوى أقتلهم، مع أمهم علشان مكانش ينفع يعيشوا من غير أمهم ولا من غيرى.

وهل قمت بالتربص للمجنى عليهم قبل ارتكاب الواقعة؟

أيوة أنا فضلت متربص لهم لحين تسمح الظروف وأقوم بقتلهم.

ألم يوقفك دافع الأبوة عن ارتكاب الواقعة حال قيامك بارتكاب الواقعة؟

لا علشان أنا كنت مرتب للواقعة من زمان.

هل قمت باستخدام ثمة مواد سامة أو مخدرة في الواقعة محل التحقيق؟

لا.

هل تعانى من أى أمراض نفسية أو عقلية؟

لا

هل تناولت ثمة عقاقير مخدرة أو مواد مخدرة أو عقاقير مؤثرة على الصحة النفسية؟

لا

هل تتعاطى أو تتناول زوجتك المتوفاة ثمة عقاقير أو مواد مخدرة؟

لا

هل لديك سوابق جنائية؟

أنا كان معمولى قضية بتبديد إيصال أمانة بس أخدت منها براءة.

وهل سبق اتهامك في قضايا مماثلة من قبل؟

لا دى أول مرة.

أنت متهم بقتل المجنى عليهم زوجتك منى محمد فتحى السجينى واطفالك المجنى عليهم عمر أحمد عبدالله ذكى، عبدالله أحمد عبدالله ذكى، وليلى أحمد عبدالله ذكى، عمد مع سبق الإصرار والترصد بأن بيت النية وعقدت العزم على ذلك واعديت لذلك الغرض سلاح أبيض "سكين" محل الاتهام واللاصق وما أن سمحت لك الظروف لارتكاب الواقعة وظفرت بهم حتى قمت بالتعدى عليهم باستخدام ذلك السلاح الأبيض وأحدثت ما بهم من إصابات التى أودت بحياتهم قاصداً من ذلك قتلهم على النحو المبين بالتحقيقات؟

أيوة أنا اللى قتلتهم كلهم.

أنت متهم بإحراز سلاح أبيض عبار عن سكين بدون ترخيص؟

أيوة فعلاً أنا كان معايا سكينة واخدها من المطبخ بتاع البيت.

هل لديك أقوال أخرى؟

لا.. "تمت أقواله وتوقع منه".