إعلام السم في العسل .. كيف علقت سحر نوح على قضية سمية الخشاب وأحمد سعد

إعلام السم في العسل .. كيف علقت سحر نوح على قضية سمية الخشاب وأحمد سعد سمية الخشاب وأحمد سعد

علقت سحر نوح على قضية الطلاق التي حدثت بين الفنانة سمية الخشاب والمطرب أحمد سعد ، واستضافة الإعلامية بسمة وهبة لهم في برنامج شيخ الحارة حيث قالت: "مافيش طلاق بيحصل من غير مشكله وكل طرف بيكون شايف إن الحق معاه، والبيوت أسرار والفنانين بشر بيحبوا ويكرهوا ويتجوزوا ويطلقوا لا هما أول البشر ولا أخرهم".

وأضافت: "لكن زمان الفنانين ماكناش نعرف أبدا أسباب طلاقهم ولا عمر حد فيهم طلع اتكلم عن حياته الشخصية والأمثلة كتير رشدي أباظه وسامية جمال فاتن حمامة وعمر الشريف نور الشريف وبوسي بليغ حمدي وورده وغيرهم كتير يادوب كان بينزل خبر بدون أي دخول في التفاصيل وكانت إشاعات كتير بتطلع عن أسباب الطلاق وبتموت لان الفنان كان بيحترم مهنته وجمهوره وقبلهم بيحترم خصوصية علاقاته وبيحترم نفسه وبيته وما بيتكلمش".

وتابعت: "زمان كانت البرامج لما بتستضيف فنان كانت ممكن تنتقد أعماله وتتناقش معاه في كل شئ ولو حدث وتطرقت لحياته الخاصة كان بيكون علي استحياء والرد بيكون موجز، لكن إننا نلاقي برنامج رمضاني قائم وفارد ساعات وإنتاج ضخم وحلقات متواصلة ومواسم لعلاقات شخص بزوجاته وأسباب الطلاق والتجاوز من كل طرف وفضح شريك حياته السابق بمنتهي الرخص والتدني والمذيعة فاهمة إن ده سبق وبتتكلم معاهم كأنها قاعدة علي كافيه أو ليڤنج بيتها و تحلفه أو تحلفها إنهم لسه بيحبوا بعض وحيرجعوا وتراهن إن الموسم القادم للبرنامج حيكشف ده يبقي ده عبث واستهتار وإعلام للاسف بيلعب في منطقة الرخص".

وأضاف: "الله يرحم زمن الإعلاميين الكبار والفنان إلي يقبل يكون في المكان ده يبقي مُفلس والإفلاس هنا مش مادي ده إفلاس أبشع، وناقصه حاجات كتييييييير بتبتدي من للطفوله والبيت والتربيه وفاتح شبابيك بيته وصندوق أسراره والواتس اب الخاص الي بينهم وتورايخ مكالمات التليفون ودفاتر الشيكات والفواتير وورقة الجواز والطلاق للي يدفع اكتر وعادي يفضح نفسه وينزل دمعتين علشان التعاطف ونسبة المشاهده واللايكات".

وكشفت: "وللأسف ده إعلام السم في العسل إلي بيعود الناس إن مافيش قيم مافيش مبادئ مافيش أي احترام لاي حاجه وواحد طالع سلويت عامل نفسه العالم بالخبايا وبواطن الأمور وبيتكلم بمنتهي قلة الإحترام، ملعونه نسبة المشاهده إلي مبنيه علي الفضايح وملعونه النجوميه إلي من النوع ده وملعونه الشهره وجنونها إلي تخلي أي شخص يتخلي عن مبادئه للي يدفع وكده رمضان لابقي شهر المغفره ولا التراحم والستر ده بالنسبالهم بقي شهر الفضائح وقلة القيمه والإحترام ومن برامج المقالب لبرامج الفضايح بتبتدي سكة إلي يروح مايرجعش وياقلبي لا تحزن".