الحاجة تهاني: استدنت لعلاج بنتي وحكم علي بـ 25 عاما .. والرئيس أنقذني .. صور

الحاجة تهاني: استدنت لعلاج بنتي وحكم علي بـ 25 عاما .. والرئيس أنقذني .. صور غارمة مفرج عنها

"كنت عايزة أعالج بنتى بس ظروفنا صعبة"، بهذه الكلمات بدأت الحاجه تهانى وجيه عبدالله حديثها لـ"صدى البلد" اثناء احتفال وزارة الداخلية بالإفراج عن 98 من الغارمين والغارمات ضمن مبادرة الرئيس عبد الفتاح السيسي "سجون بلا غارمين أو غارمات".

وقالت الحاجه تهانى : "كل حلمى إنى أشوف بنتي الكبيرة هاجر تمشى على رجليها زي باقي أصحابها، لفيت على دكاترة كتير ومكنش فى حل غير إننا نعملها عملية تغيير أوطار ودى كانت تكلفتها 80 ألف جنيه وإحنا غلابة معناش الفلوس دى كلها". 

وأكملت حديثها: "أنا جوزي راجل أرزقي ميقدرش على الفلوس دى وعندنا ولد تانى اسمه رجائى عنده 3 سنوات، ومكنش قدامي حل غير إنى استلف الـ 80 ألف جنيه بتوع العملية واكتب على نفسى وصلات أمانة".

وأضافت: "محسبتش حاجة خالص كل اللى كان نفسى فيه انى اشوف بنتى بتشى وبالفعل استلفت فلوس وكتبت على نفسى 10 وصلات أمانة كل واحد بـ 10 آلاف جنيه، بس معرفتش أسدد الفلوس دى، فقام صحاب الوصلات بتحرير محاضر ضدى وخدت أحكام بمدة 25 سنة سجن".

وأكملت: "بقالى 6 شهور فى السجن نفسى اخرج اعيش وسط عيالى ، بس مكنش عندى امل انى اشوفهم تانى، وفوجئت بأحد ضباط السجن بيقولى مبروك يا حاجة الرئيس السيسي أفرج عنك وهتخرجي لعيالك".

وأضافت: "من كتر فرحتى بالخبر ده مصدقتش نفسى، وفضلت طول الليل ادعى للرئيس عبد الفتاح السيسي ربنا يحميه ويفرحه، زى مفرحنا ولمنا مع عيالنا تانى".